طارق السيد يكشف عن شرط صعب لوالد زيزو للعدول عن الانضمام للأهلي

كشف طارق السيد، نجم الزمالك السابق، عن شرط تعجيزي من والد زيزو من أجل التراجع عن الانضمام للنادي الأهلي والاستمرار مع القلعة البيضاء.

وقال طارق السيد خلال ظهوره التليفزيوني: «أنا قلت لكابتن حازم إمام إن موضوع زيزو خلصان وخلص مع الأهلي كل حاجة، والموضوع اتقفل. وأنا بتكلم مع والده، رابط استمرار نجله في الزمالك برحيل مجلس إدارة الزمالك الحالي، ومينفعش مهما كانت نجوميتك تربط استمرارك برحيل المجلس».

وكان أحمد سيد زيزو قد كشف عن مصيره مع نادي الزمالك في بيان رسمي وجاء على النحو التالي:

«الحمد لله.. أنا رجل أحترم كل الناس.. لكن للأسف عدم ردي على المعلومات المغلوطة والتزامي.. كل ساعة خبر عن توقيع أو تجديد عقد زيزو، وكل واحد بيغازل الشريحة اللي عايزها من الجمهور بسبب خبر رايح وخبر جاي».

«بكل وضوح، أنا لم أوقع لأي نادي سواء داخل أو خارج مصر. اللي حصل على توقيعي يتفضل يعلن.. إذا كان كلامه صحيح؟.. كمان اللي عنده دليل على توقيعي لأي نادي، برضو يتفضل يطلعه على الملأ».

«الناس لازم تعرف كويس، أنا بقدر جدا الكيان الكبير اللي أنا بلعب فيه.. ولا يمكن أنكر فضله علي. لكن فيه حاجة أنا مكنتش حابب أتكلم فيها خالص.. لأنه للأسف الأمور في الإعلام كلها في اتجاه واحد.. ليه محدش اتكلم عن حقوقي المشروعة زي أي لاعب في الدنيا».

«ليه محدش اتكلم إن الناس سابتني بقالها شهور طويلة ومش عايزين يجددوا عقدي. ليه محدش اتكلم عن المستحقات المتأخرة اللي ليا بقالها كتير ومش لاقي حد يجاوبني. ليه محدش اتكلم أن التجديد المرة دي جاي في مرحلة متقدمة من عمري بالنسبة للاعبي الكورة.. ولعيب الكورة مهما طال، عمره قصير في الملعب.. وأكيد كل واحد فيكم عنده أسرة وعليه التزامات كتير.. محدش كمان اتكلم إن ربنا سبحانه وتعالى أنعم علي بعروض مقابلها المالي 5 أضعاف العرض اللي موجود».

«ورغم كل ده، قلت وهفضل أقول أنا منتظر كلمة النادي، وده لاعتبارات كتير، مش لتجميل الصورة. والجماهير لازم تكون عارفة الحقيقة.. زيزو مش بيزايد.. ولا بيتاجر.. لكن لازم الطرف التاني يكون عايزني أكمل.. وتكون فيه استجابة لربع المعروض علي على الأقل..لكن للأسف الكلام معايا حاجة.. واللي بيتقال للإعلام حاجة تانية.. أنا مينفعش أجرح في حد، ولا أتكلم في حق حد.. لأن اللي بيتقال في الجلسات عيب يتقال برة.. على الأقل من ناحيتي».

«أنا مستني رد النادي لحد آخر يوم في الكونفدرالية.. وأتمنى ربنا يكرمنا بيها أنا وزمايلي. وأي كلام هيتقال غير كدة في موضوع التجديد أو التوقيع قبل الموعد ده، هيكون كلام غير صحيح. ورسالتي الودية جدا للمسئولين في النادي اللي أنا بحترمهم جميعا.. أتمنى الحوار في مسألة تجديد العقد يكون بيني وبينكم.. مش عن طريق الإعلام.. وأنا كنت ولا زلت واضح معاكم في كل اللي اتكلمت فيه من أمور عادلة تساعدنا على أننا نكمل الطريق. شكرا على تفهمكم موقفي».